啲人成日講緣份，佛家好鍾意講「緣起性空」，就話俾你知唔一定係有因先至有果。不過緣份二字代表某一種程度嘅隨機性，可能係一啲混沌嘅結果，亦都可能係一個事件誘發出黎嘅蝴蝶效應。

偶然會有啲霧水情緣，能夠維持落去嘅緣份唔多，分分合合，可能呢啲係緣份。我都講唔埋，呢個概念好虛無，或者啱嘅時侯遇上啱嘅人，就係大眾認知嘅緣份。

東方人就會講緣份，西方人我就唔知，不過吸引力法則都係一種緣份嘅體驗。物以類聚，人以群分。可能諗法價值觀相近，做嘢手段成就差唔多嘅人係會容易擺埋一齊。痴痴呆呆，坐埋一枱，可能都係一種緣份。

緣份嚟到，點都要珍惜，始終天下無不散之筵席，可能下一日你就死咗，或者佢又瓜柴。能夠一齊工作，一齊玩樂，呢啲緣份點都要珍惜下掛？

更新時間：1/3/2024